បូនីតា ដាដេណា អ្នក​បម្រើ​លួច​ប្រាក់​អស់​ជាង ២០០០ ដុល្លារ

, , Leave a comment

ទឹកប្រាក់​ជាង​​២០០០​ដុល្លារ​ ត្រូវបាន​របូត​ចេញ​ពី​ផ្ទះ​ អ្នក​នាង បូនីតា ដាដេណា​ បន្ទាប់​ពី​​ស្រី​ជា​អ្នក​បម្រើ​ឈ្មោះ ន.រ ម្នាក់​លួច​យក​ទ្រព្យ​សម្បត្តិ និងបាន​​រត់​ចេញ​ពី​ផ្ទះ​។ ម្ចាស់ផលិតកម្ម​ អធិមង្គល អ្នក​នាង​ ដាដេណា ​បាន​ប្រាប់កាល​ម្សិលមិញ​ថា ទឹក​ប្រាក់​ដែល​បាន​បាត់​បង់​ទៅ​នោះ​មាន​ចំនួន​២៣៥០ ដុល្លារ និង​សម្ភារៈ​មួយ​ចំនួន​ទៀត។ ” ពេល​នោះ​កូន​ស្រី​របស់​ខ្ញុំ​មក​ពី​ទារ​លុយ​គេ ដោយ​ផ្ញើ​នៅ​​គាត់​ដើម្បី​ទុក​ឲ្យ​ខ្ញុំ ដឹង​អី​ស្រាប់​តែ​នាង​យក​ហើយ​រត់​ទៅ​បាត់​តែ​ម្ដង”។

 

ម្ចាស់​ផលិតកម្ម​រូប​នេះ ​បាន​បន្ត​ថា អ្នក​នាង​មិន​បាន​ស្គាល់​ទី​លំនៅ​ពិត​ប្រាកដ​របស់ន.រ​នោះទេ ដោយ​គ្រាន់​តែ​បាន​ដឹង​ថា នាង​មាន​ទី​លំនៅ​ស្រុក​ដំដែក ខេត្ត​សៀម​រាប និង​បាន​ស្គាល់​គ្នា​ ខណៈ​អ្នក​នាង​យក​រឿង​ភាពយន្ត​របស់​ខ្លួន​ទៅ​ចាក់​បញ្ចាំង​នៅ​ខេត្ត​នោះ​កន្លង​មក។ អ្នក​នាង​បន្ថែម៖ “ ខ្ញុំ​មិន​ចង់​បាន​លុយ​នោះ​មក​វិញ​ទេ ប៉ុន្តែ​ខ្ញុំ​ចង់​បាន​គាត់​មក​វិញ​ដើម្បី​សួរ​នាំ​មួយ​ចំនួន​ថា ហេតុ​អ្វី​បាន​ជា​មនុស្ស​ដែល​ខ្ញុំ​អាណិត​ខំ​ជួយ បែរ​ជា​ធ្វើ​បាប​ខ្ញុំ​ដូច្នេះ​ទៅ​វិញ?”។ អ្នកនាង​បាន​បញ្ជាក់ថា រហូតមក​ទល់​នឹង​ពេល​នេះ នាង​មិន​ចង់​ប្រើវិធាន​​ផ្លូវ​ច្បាប់​នោះទេ ដោយ​គ្រាន់​តែ​ប្រកាស​តាម​វិទ្យុ និង​តាម​បណ្ដាញ​សង្គម Facebook ដោយ​គ្រាន់​តែ​ចង់​​ឲ្យ​ន.រ មក​ប្រាប់​ពី​ហេតុ​ផល​ថា ហេតុ​អ្វី​ន.រ ​ក្បត់​ទំនុក​ចិត្ត​។

 

ម្ចាស់​ផលិតកម្ម​​បន្ថែម​ថា៖” ខ្ញុំ​សោកស្ដាយ​ដែល​ទុក​ចិត្ត​មនុស្ស​ខុស​ដូច្នេះ​ ព្រោះ​​មិន​បាន​ស៊ើប​ពី​ប្រវត្តិ ឬ​កន្លែង​រស់​នៅ​ឲ្យ​បាន​ច្បាស់​លាស់​មុន​ទទួល​មក​នៅ។ នេះ​ដោយ​សារ​តែ​ស្រលាញ់ និង​អាណិត​ចង់​ជួយ​របស់​ខ្ញុំ”។ អ្នក​នាង​ចាត់​ទុក​ថា នេះ​ជា​រឿង​ស៊យ​មួយ​​នៅ​ឆ្នាំ​នេះ ។ អ្នក​នាង បូនីតា ដាដេណា ជា​តារា​សម្ដែង និង​ជា​​ម្ចាស់​ផលិតកម្ម អធិមង្គល ។ អ្នក​នាង​ទើប​តែ​បញ្ចប់​រឿង​ថ្មី​របស់​ខ្លួន​ដែល​មាន​ចំណង​ជើង​ថា ” ព្រាយ​បាត​បល្ល័ង្ក ” និង​ត្រៀម​ចាក់​បញ្ចាំង​នៅ​ខែ​តុលា​ខាង​មុខ​នេះ បន្ទាប់​ពី​រឿង” ប្រពន្ធ​ខ្ញុំ​អាប” ទទួល​បាន​ប្រាក់​ចំណេញ​គ្រាន់​បើ។ យ៉ាង​ណា អ្នក​នាង​បង្ហាញ​សុទិដ្ឋិនិយម​ថា រឿង​ក្រោយ​នេះ​ប្រាកដ​ជា​ជោគជ័យ​ជាង​មុន​មិន​ខាន៕

151 151 (1)

ប្រ​ភព សប្បាយ

 

Leave a Reply

(*) Required, Your email will not be published