លោក​ផ្កាយ​៣ សៀក សុជាតិ មិនដែល​ហ៊ាន​ហើបមាត់ ពី​ការ​នាំចូល​ទំនិញគេចពន្ធ តាម​ច្រក​ម៉ាឡៃ​របស់​គ្រួសារ​លោក ពេជ្រ វណ្ណា

, , Leave a comment

​ខេត្តបន្ទាយមានជ័យ ៖ ច្រើន​ឆ្នាំ​មកហើយ​ដែល​លោក ពេជ្រ វណ្ណា ជា​ប្រធានការិយាល័យ​ទំនាក់ទំនង​ការងារ​ព្រំដែន កម្ពុជា​-​ថៃ ដែល​ឡើង​បន្ត​តំណែង​ពី​លោក ឌី ផេ​ន បាន​រកស៊ី​នាំចូល​ទំនិញគេចពន្ធ​និង​ទំនិញ​ខុសច្បាប់​ជាច្រើន​ប្រភេទ​មកពី ​ស្រុកថៃតាម​ច្រកព្រំដែន​នៃ​ស្រុក​ម៉ាឡៃ ដោយ​គ្មាន​ការរំខាន​ពី​មន្ត្រី​ជំនាញ​និង​សមត្ថកិច្ច​ពាក់ព័ន្ធ​នោះទេ ព្រោះ​លោក ពេជ្រ វណ្ណា មាន​ទំនាក់ទំនង​ល្អ​ក្នុង​ការបង់​លុយកាក់​ជូន​មន្ត្រី​ជំនាញ​និង​សមត្ថកិច្ច ​ពាក់ព័ន្ធ ដើម្បី​កុំ​ឲ្យ​ទៅ​រំខាន​ការរកស៊ី​ដឹកជញ្ជូន​ទំនិញគេចពន្ធ​របស់គាត់ ដែល​ទាមទារ​ឲ្យ​លោក​ផ្កាយ​៣ សៀក សុជាតិ នាយក​ទីចាត់ការ​ការងារ​ព្រំដែន​កម្ពុជា ពិនិត្យមើល​បញ្ហា​នេះ​ឡើងវិញ​ផង​។


​មន្ត្រី​តូចតាច​បាន​បង្ហើប​ឲ្យ​ដឹងថា ក្រុមគ្រួសារ​លោក ពេជ្រ វណ្ណា បច្ចុប្បន្ននេះ​កំពុង​រកស៊ី​នាំចូល​ទំនិញ​ជាច្រើន​ប្រភេទ​មកពី​ស្រុកថៃ ដូចជា​គ្រឿងសំណង់ ដែក​ស៊ីម៉ងត៍ ហ្គាស ជ្រូក ហើយ​ទំនិញ​របស់លោក ពេជ្រ វណ្ណា ដែល​នាំចូល​តាម​ច្រក​ម៉ាឡៃ​នេះ ភាគច្រើន​គ្មាន​ការបង់ពន្ធ ហើយ​បើ​បង់ពន្ធ​ក៏បាន​ត្រឹមតែ ៣០​ភាគរយ​ប៉ុណ្ណោះ អាច​និយាយបានថា ការនាំ​ចូល​ទំនិញគេចពន្ធ​របស់លោក ពេជ្រ វណ្ណា ភាគច្រើន​ជា​ប្រភេទ​ទំនិញគេចពន្ធ ហើយ​គាត់​អាច​យកមក​លក់​ចែកចាយ​នៅក្នុង​ខេត្តបន្ទាយមានជ័យ និង​ខេត្តបាត់ដំបង​យ៉ាង​រលូន​ល្អ​។ តាំងពី​ចំណុច​ព្រំដែន​ស្រុក​ម៉ាឡៃ រហូតដល់​ទីតាំង​ស្តុក​ទំនិញ​ជាច្រើន​កន្លែង​របស់លោក ពេជ្រ វណ្ណា ក្នុង​ខេត្តបន្ទាយមានជ័យ និង​ខេត្តបាត់ដំបង គេ​សង្កេតឃើញ​មន្ត្រី​ជំនាញ​គយ ក៏ដូចជា​សមត្ថកិច្ច​ដែល​ប្រចាំការ​នៅ​ច្រកព្រំដែន​និង​តាម​ដងផ្លូវ សុទ្ធតែ​បាន​ជួយ​ជ្រោមជ្រែង​និង​សម្របសម្រួល​ការរកស៊ី​ដឹកជញ្ជូន​ទំនិញ​ របស់លោក ពេជ្រ វណ្ណា មិនដែល​ឲ្យ​ទើសចិត្ត​ម្តងណា​ឡើយ​។​


​ទំនិញ​របស់លោក ពេជ្រ វណ្ណា ភាគច្រើន​នាំចូល​ដោយ​បំពាន​ទៅលើ​សិទ្ធិផ្តាច់មុខ​របស់​ក្រុមហ៊ុន​ស្របច្បាប់ ​មួយចំនួន ផងដែរ ដូចជា​ប្រភេទ​ដែក ស៊ីម៉ងត៍ ហ្គាស ជាពិសេស​ជ្រូក​ក្រហម​ដែល​ត្រូវបាន​នាំចូល​ពី​ស្រុកថៃ ផ្ទុយ​ពីបទ​បញ្ជា​របស់​រាជរ​ដ្ឋា​ភិ​បាល មិនដែល​មានការ​ត្រួត​ពិនិត្យ​ពី​ជំនាញ​ពេទ្យសត្វ​ម្តងណា​ឡើយ ធ្វើ​ឲ្យ​ប្រជាពលរដ្ឋ​សម្តែង​ភាព​ក្តៅក្រហាយ​យ៉ាងខ្លាំង ព្រោះ​ការនាំ​ចូល​ជ្រូក​ក្រហម​មកពី​ស្រុកថៃ មក​លក់​ចែកចាយ​ក្នុងប្រទេស​កម្ពុជា អាចជា​ប្រភព​ចម្លងជំងឺ​គួរ​ឲ្យ​បារម្ភ។ ការ​នាំចូល​ទំនិញ​ដោយមាន​ការជួយ​សម្រប​សម្រួល​ពី​ប្រធានការិយាល័យ​គយ​និង​ រដ្ឋាករ​ប្រចាំ​ស្រុក​ម៉ាឡៃ  លោក ពេជ្រ វណ្ណា អាច​ប្រមូល​ប្រាក់ចំណេញ​បាន​ច្រើនសន្ធឹក​សន្ធាប់​យកទៅ​ច្រក​ហោប៉ៅ ធ្វើ​មាន​ធ្វើបាន​ផ្ទាល់ខ្លួន ដោយសារតែ​មិនមាន​ការបង់ពន្ធ​ជូន​រដ្ឋ​ត្រឹមត្រូវ​។


​សកម្មភាព​ដឹកជញ្ជូន​ទំនិញគេចពន្ធ​របស់លោក ពេជ្រ វណ្ណា ក្នុង​មួយថ្ងៃៗ​មាន​ទំហំធំធេង​បើ​និយាយ​ពី​ការដឹកជញ្ជូន​វិញ​គឺ​លោក ពេជ្រ វណ្ណា បាន​ប្រើប្រាស់​រថយន្ត​យី​ឌុប​ផ្ទាល់ខ្លួន​ចំនួន​១០​គ្រឿង គឺ​ដឹកជញ្ជូន​ទំនិញ​តាំងពី​ចំណុច​ព្រំដែន មក​ស្តុក​ទុក​នៅក្នុង​ឃ្លាំង ឯ​ខេត្តបាត់ដំបង​និង​ខេត្តបន្ទាយមានជ័យ ហើយ​បន្ត​ដឹក​យកទៅលក់​ចែកចាយ​ដល់​ខេត្តបន្ទាយមានជ័យ បាត់ដំបង និង​រាជធានី​ភ្នំពេញ ផងដែរ​។ រាល់​ការដឹកជញ្ជូន​ទំនិញ​របស់លោក ពេជ្រ វណ្ណា សុទ្ធតែ​ប្រើប្រាស់​រថយន្ត​ដែល​ត​ទ្រុង​ខុស​លក្ខណៈ​បច្ចេកទេស​ផ្ទុក​លើស​ ទម្ងន់​បំផ្លាញ​ផ្លូវ​ពី​ស្រុក​ម៉ាឡៃ​ចូល​តាម​ខេត្តបន្ទាយមានជ័យ​និង​ បាត់ដំបង​ជាច្រើន​កន្លែង ធ្វើ​ឲ្យ​ប្រជាពលរដ្ឋ​ពិបាកធ្វើ​ដំណើរ និង​ព្រួយបារម្ភ​ពី​សុវត្ថិភាព​ដោយសារតែ​រថយន្ត​ដឹកជញ្ជូន​ទំនិញ​របស់លោក ពេជ្រ វណ្ណា បើកបរ​គ្មាន​សណ្តាប់ធ្នាប់​យ៉ាង​អនាធិបតេយ្យ​បំផុត មិន​ខ្វល់​ពី​ផលប៉ះពាល់​ចំពោះ​អ្នកដំណើរ​តាម​ដងផ្លូវ​នោះទេ​។​


លោក ពេជ្រ វណ្ណា ចាប់តាំងពី​បាន​ឡើង​តំណែង​ជា​ប្រធានការិយាល័យ​ទំនាក់ទំនង​ការងារ​ព្រំដែន​ កម្ពុជា​-​សៀម ជំនួស​លោក ឌី ផេ​ន គេ​សង្កេតឃើញ​លោក ពេជ្រ វណ្ណា កាន់​តែមាន​ឥទ្ធិពល​និង​អំណាច​ខ្លាំង​សម្បើម​ហើយ​គាត់​អាច​យក​តួនាទី​នេះ​មក ​ពង្រឹងពង្រីក​មុខ​ជំនួញ​រកស៊ី​ដឹកជញ្ជូន​ទំនិញគេចពន្ធ កាន់តែ​អនាធិបតេយ្យ​ខ្លាំង​ឡើង គ្មាន​នរណា​ហ៊ាន​ប៉ះពាល់​ទេ ។ យ៉ាងណាក៏ដោយ លោក​ផ្កាយ​៣ សៀក សុជាតិ នាយក​ទីចាត់ការ​ការងារ​ព្រំដែន​កម្ពុជា ទំនងជា​ទទួលបាន​ផលប្រយោជន៍​ពី​ការរកស៊ី​ដឹកជញ្ជូន​ទំនិញគេចពន្ធ​របស់លោក ពេជ្រ វណ្ណា ខ្លះ​ដែរ​ហើយ​មើលទៅ បានជា​សកម្មភាព​រក​ស៊ី​គេចពន្ធ​បំផ្លាញ​ចំណូល​ថវិកាជាតិ​របស់​លោក ពេជ្រ វណ្ណា អាច​ដំណើរការ​ដោយ​រលូន​ល្អ ជាពិសេស​គេ​មិនដែល​ឃើញ​លោក សៀក សុជាតិ កោះហៅ​លោក ពេជ្រ វណ្ណា មក​សួរនាំ​ឬ​ដាក់ពិន័យ​ម្តងណា​ឡើយ​៕

 

Leave a Reply

(*) Required, Your email will not be published