សាលាដំបូង​ខេត្តស្វាយរៀង បាន​ពន្យា​ពេល​បើកសវនាការ​លើ​សំណុំរឿង អតីត​អភិបាលក្រុង​បាវិត លោក ឈូក បណ្ឌិត

, , Leave a comment

​តុលាការខេត្ត​ស្វាយរៀង​នៅ​ព្រឹក​ថ្ងៃទី​២១ ខែឧសភា បានសម្រេច​លើក​ពេល​សវនាការ​ជំនុំជម្រះ​ក្នុង​សំណុំរឿង​បាញ់​កម្មករ រោងចក្រ​កៅ​វ៉េ (Kaoway) ៣​នាក់ អោយ​រងរបួស ដែលមាន​អតីត​អភិបាលក្រុង​បាវិត លោក ឈូក បណ្ឌិត ជា​ជនសង្ស័យ ដោយ​សំអាងថា អវត្តមាន​មេធាវី​ការពារ​ជនជាប់ចោទ​។ នៅក្នុង​សវនាការ​គេ​ឃើញ​មាន​វត្តមាន​ជនរងគ្រោះ សហជីព​កម្មករ អង្គការ​មិនមែន​រដ្ឋាភិបាល​ជាតិ និង​អន្តរជាតិ ដែល​ឃ្លាំមើល​រឿងក្ដី​នេះ​។ ប៉ុន្តែ​គេ​ពុំ​ឃើញ​មាន​វត្តមាន​ជនជាប់ចោទ លោក ឈូក បណ្ឌិត និង​មេធាវី​ការពារ​លោក​ឡើយ​។


​ករណីនេះ​ចៅក្រម​ជំនុំជម្រះ​សម្រេច​មិន​បន្ត​ដំណើរការ នីតិវិធី​សវនាការ​ភ្លាមៗ​បន្ទាប់ពី​បាន​ដំណើរ​រយៈពេល​ជិត​មួយ​ម៉ោង​ទៅលើ សំណុំរឿង​លោក ឈូក បណ្ឌិត ដែល​បាន​បាញ់ប្រហារ​ទៅលើ​ហ្វូង​កម្មករ បណ្តាល​ឲ្យ​កម្មការិនី ៣​នាក់​រងរបួស​ក្នុងអំឡុងពេល​តវ៉ា​ក្នុង​តំបន់​សេដ្ឋកិច្ច​ពិសេស ត្រូវបាន​សាលាដំបូង​ខេត្តស្វាយរៀង​សម្រេច ទម្លាក់ចោល​ការចោទប្រកាន់​ម្តង​រួចហើយ កាលពី​ថ្ងៃទី​២១ ខែធ្នូ ឆ្នាំ ២០១២​។ ហើយ​នៅ​ថ្ងៃទី​៤​មីនា ឆ្នាំ​២០១៣ សាលាឧទ្ធរណ៍​បានសម្រេច​ធ្វើការ​ចោទប្រកាន់​សាជាថ្មី​ឡើងវិញ ពីបទ​បង្ក​របួសស្នាម​ដោយ​អ​ចេតនា ហើយ​បង្វិល​សំណុំ​រឿងនេះ​ទៅ​ឲ្យ​តុលាការ​ខេត្តស្វាយរៀង​បើកសវនាការ​សា​ជា ថ្មី​ឡើងវិញ​។​

ចៅក្រម​ជំនុំជម្រះ និង​ជា​អនុប្រធាន​តុលាការខេត្ត​ស្វាយរៀង លោក លាង សួគ៌ បានប្រកាស​នៅក្នុង​បន្ទប់​សវនាការ​ជា​សាធារណៈ​ចំពោះមុខ​ជនរងគ្រោះ​តំណាង សហជីព និង​អង្គការ​មិនមែន​រដ្ឋាភិបាល​ដែល​ឃ្លាំមើល​សវនាការ​ថា មេធាវី​ការពារ​ជនជាប់ចោទ គឺ​កញ្ញា ម៉ៅ សំ​វុ​ទ្ធា​រី បានដាក់​ពាក្យសុំ​ពន្យារពេល​សវនាការ​ដោយ​មូលហេតុ​ជាប់​បំពេញបេសកកម្ម​នៅ ប្រទេស​ជប៉ុន​។​

ជនរងគ្រោះ តំណាង​សហជីព និង​អង្គការ​មិនមែន​រដ្ឋាភិបាល​បាន​ខកចិត្ត​ចំពោះ​ការលើក​ពេលនេះ និង​បាន​ហៅ​ការពន្យារពេល​សវនាកា​រថា ពុំបាន​ឈរលើ​ហេតុផល​ត្រឹមត្រូវ​។​ ​ជនរងគ្រោះ​លោកស្រី កែវ នា មានប្រសាសន៍ថា នាង​បាន​រង់ចាំ​យុត្តិធម៌​ជាង ១​ឆ្នាំ​មកហើយ មកដល់ពេលនេះ​នាង​នៅមាន​សង្ឃឹម​តិចតួច​ប៉ុណ្ណោះ​។ នាង​ទទូច​អោយ​តុលា​ការរក​យុត្តិធម៌​អោយ​ពួកនាង ដែលជា​ជនរងគ្រោះ​ក្រីក្រ គ្មាន​អំណាច​។​
​កាលពី​ថ្ងៃទី​៤ មីនា សាលាឧទ្ធរណ៍​បាន​ចោទប្រកាន់​លោក ឈូក បណ្ឌិត ជា​អភិបាលក្រុង​បាវិត ពីបទ​បង្ក​របួសស្នាម​ដោយ​អ​ចេតនា​តាម​ក្រមព្រហ្មទណ្ឌ​មាត្រា ២៣៦ ហើយ​បញ្ជូន​សំណុំ​រឿងនេះ​ទៅ​សាលាដំបូង​ខេត្តស្វាយរៀង ដើម្បី​ជំនុំជម្រះ​តាមផ្លូវ​ច្បាប់​។ ករណីនេះ​ប្រសិនបើ​រកឃើញថា មាន​កំហុស​ជនល្មើស​អា​ច​ជាប់ពន្ធនាគារ​ពី ៦​ខែ ដល់ ២​ឆ្នាំ និង​ពិន័យ​ជា​ប្រាក់​ពី ១​លាន​រៀល ទៅ ៤​លាន​រៀល​។​


​ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា លោក ជា មុនី មានប្រសាសន៍ថា លោក​នៅតែ​មើលឃើញថា យុត្តិធម៌​នៅតែ​ពិបាក​ត្រូវគេ​ផ្ដល់អោយ​ក្រុមកម្មករ​រងគ្រោះ​។​ ​តំណាង​សហភាព​សហព័ន្ធ​សហជីព កាលពី​ថ្ងៃទី​១៧ ខែឧសភា បានចេញ​សេចក្តីថ្លែងការណ៍ រួម​ដោយ​ទទូច​សុំ​ឲ្យ​តុលាការ​ផ្តន្ទាទោស​ជនល្មើស​ឈូក បណ្ឌិត​ឲ្យ​បាន​ធ្ងន់ធ្ងរ​បំផុត​សម​ទៅនឹង​ទង្វើ​របស់ខ្លួន​និង​បង់​សំណង ជូន​កម្មការិនី​រងគ្រោះ​ឲ្យ​បាន​សមរម្យ​និង​សូម​ឲ្យ​រដ្ឋាភិបាល​ផ្តល់​ការ គាំទ្រ​ចំពោះ​ការផ្តន្ទាទោស​ឲ្យ​បាន​ធ្ងន់ធ្ងរ​ទៅលើ​លោក​ឈូក បណ្ឌិត​ដើម្បី​បង្ហាញ​ពី​ចេតនា​លុបបំបាត់​និទ្ទណ្ឌភាព​និង​លុបបំបាត់​ការ សង្ស័យ​នានា​ពី​សំណាក់​សាធារណជន​លើ​ករណីនេះ​។​


​លោក អំ សំអាត អ្នកស៊ើប​អង្កេត​ជាន់ខ្ពស់​នៃ​អង្គការ​ការពារ​សិទ្ធិមនុស្ស​លីកាដូ មានប្រសាសន៍​នៅក្នុង​សន្និសីទ​សារព័ត៌មាន​នៅខាងមុខ​តុលាការខេត្ត ស្វាយរៀង​ថា លោក ឈូក បណ្ឌិត ទំនង​ភ័យខ្លាច​ថា​គាត់​អាច​នឹងមាន​បញ្ហា​នៅពេល​ប្រឈមមុខ​ចំពោះមុខ ច្បាប់ ទើប​រក​លេស​ដើម្បី​ពន្យារពេល​។ យ៉ាងណា លោក​សង្ឃឹមថា តុលាការ​នឹងមិន​ទុកអោយ​សំណុំ​រឿងនេះ​អូស​បន្លាយពេល​បន្ថែមទៀត​ទេ​៕

22-7

 

Leave a Reply

(*) Required, Your email will not be published