កុល ដាវី ចេញពី​អាមេរិក គ្រោង​ទៅ​សម្តែង​នៅ កាណាដា ម្តងទៀត​

, , Leave a comment

ទើបតែ​បាន​ចប់​ការសម្តែង​លើ​ទឹកដី​ប្រទេស​កាណាដា​ជាមួយ​លោក សុខ រក្សា កាលពី​ខែមករា​ដើមឆ្នាំ​មិនបាន​ប៉ុន្មាន​ផង​នោះ កញ្ញា កុល ដាវី ប្រាប់ថា នាង​គ្រោង​នឹង​ត្រឡប់​ទៅ​សម្ដែង​នៅ​ទីនោះ​ម្ដងទៀត​នាពេល​ឆាប់ៗ​ខាងមុខនេះ ក្រោយ​ចប់​ការសម្ដែង​នៅ​អាមេរិក​ក្នុងពេល​បច្ចុប្បន្ននេះ​។ បញ្ហា​នេះ គឺ​ដោយសារ Sponsor ដែល​ធ្លាប់​ធានា​នាង​ទៅ​សម្ដែង​ម្ដង​រួចមកហើយ​នោះបាន​បង្ហាញ​ចេតនា​ចង់​ធានា​នាង​ឱ្យទៅ​សម្ដែង​ម្ដងទៀត ក្រោយពី​ប្រជាជន​ខ្មែរ​នៅ​ទីនោះ​ពេញចិត្ត​ចំពោះ​ការសម្ដែង​របស់​នាង​ជាមួយ​លោក សុខ រក្សា​។​
 

​ឆ្លើយតប​តាមរយៈ​សារ​អេឡិចត្រូនិក​កញ្ញា កុល ដាវី បាន​និយាយថា “​នាង​សប្បាយចិត្ត​ខ្លាំងណាស់​នៅពេលដែល​ម្ចាស់ Sponsor នៅ​កាណាដា​ធានា​ខ្ញុំ និង​លោក សុខ រក្សា​ឱ្យទៅ​សម្ដែង​ប្រទេស​នេះ​ម្ដងទៀត​”។​ ​តារា​សម្ដែង​សិច​ស៊ី​រូបនេះ​បាន​បន្តថា ពេលនេះ​នាង​កំពុងតែ​សម្ដែង​នៅក្នុង​ទីក្រុង​ឡុង​ប៊ិច​រដ្ឋ​កាលីហ្វ័​ញ៉ា សហរដ្ឋអាមេរិក​ហើយ​រយៈពេល​មួយខែ​ទៀត​ប៉ុណ្ណោះ​នឹង​បញ្ចប់​ការសម្ដែង​នៅលើ​ទឹកដី​ប្រទេស​មហាអំណាច​មួយ​នេះ​។ ដូច្នេះ​ក្រោយពី​បញ្ចប់​ការសម្ដែង​នៅ​អាមេរិក​នេះ​កញ្ញា កុល ដាវី នឹង​ដឹក​ដៃ​លោក សុខ រក្សា ទៅ​សម្ដែង​នៅ​ប្រទេស​កាណាដា​ម្ដងទៀត​ជាទី​ដែល​នាង​ទទួលបាន​ការគាំទ្រ​ពី​សំណាក់​ប្រជាជន​ខ្មែរ​នៅ​ទីនោះ​។​


​យ៉ាងណាក៏ដោយ​តារា​សម្ដែង​សិច​ស៊ី​មាន​ប្រភព​មកពី​ខេត្តបន្ទាយមានជ័យ​រូបនេះ​មិនបាន​បញ្ជាក់​លម្អិត​ពី​មូលហេតុ​នាំឱ្យ Sponsor នៅ​កាណាដា​ជ្រើសរើស​នាង​ឱ្យទៅ​សម្ដែង​ម្ដងទៀត​ទេ​។ កុល ដាវី គ្រាន់តែ​បញ្ជា​ក់ដោយ​ខ្លី​ថា​បងប្អូន​ខ្មែរ​នៅ​ទីនោះ​ពេញចិត្ត​ចំពោះ​ការសម្ដែង​របស់​នាង​ជាមួយ​លោក សុខ រក្សា​។​
​ក៏​ដូចគ្នា​ដែរ តារា​សម្ដែង វ័យ​២៧ ឆ្នាំ​រូបនេះ មិនបាន​បញ្ជាក់​ពី​រយៈពេល​ប៉ុន្មាន​នៃ​ការ​ទៅ​សម្ដែង​នៅ​ប្រទេស​កាណាដា ទេ​។ នាង​អះអាងថា មកទល់នឹង​ពេលនេះ ខាង​Sponsor នៅ​កាណាដា កំពុងតែ​ញាប់ដៃ​ញាប់ជើង រត់ការ​ឯកសារ​ពាក់​ព័ន្ធ​នានា នៅ​មិនទាន់​ឆ្លើយតប​យ៉ាងណា​នោះទេ​។ ប៉ុន្តែ​នាង​សង្ឃឹមថា អ្វីៗ​នឹង​ទទួលផល​វិជ្ជមាន ច្រើនជាង​អវិជ្ជមាន​។​
 


​កញ្ញា កុល ដាវី បង្ហាញ ទឹកចិត្ត​សប្បាយរីករាយ បន្ទាប់ពី​សម្ដែង​នៅ​អាមេរិក​បាន​រយៈពេល​ពី​រ​ខែ​ទទួលបាន​ការគាំទ្រ ច្រើន​ពី​ទស្សនិកជន ហើយ​មាន​ទស្សនិកជន​ខ្លះ ចង់ឱ្យ​តារា​សម្ដែង​រូបនេះ​បន្ត​សម្ដែង​នៅលើ​ទឹកដី​អាមេរិក​ឱ្យបាន​យូរ បន្ថែមទៀត​។​


​ទាក់ទង​ការចាប់​ដៃគូ​សម្ដែង​ជាមួយ​តារាចម្រៀង​លោក សុខ រក្សា នេះដែរ មានការ​ចុះផ្សាយ​ពី​កាសែត​ក្នុងស្រុក​ជាច្រើន​ថា​កញ្ញា កុល ដាវី មាន​ស្នេហា​ក្រៅ​ឆាក​នឹង​គ្នា​។ ប៉ុន្តែ​ជុំវិញ​បញ្ហា​នេះ​អ្នក​ទាំង​ពីរបាន​ច្រានចោល​ចំពោះ​ដំណឹង​នេះ​។​ ​កញ្ញា កុល ដាវី បាន ឈាន​ចាប់​អាជីព​ជា​អ្នកសិល្បៈ​ក្នុង​ឆ្នាំ​២០០៥​។ នាង​ធ្លាប់​សម្ដែង​រឿង​ជាច្រើន​ឱ្យ​ស្ថានីយទូរទស្សន៍​ក្នុងស្រុក​នានា ហើយ​រឿង​ចុងក្រោយ​របស់​នាង​ទទួលបាន​ការគាំទ្រ​ច្រើន​គឺ​រឿង​”​សង្សារ​ខ្ញុំ អាប​”៕

18 (1) 18 (2) 18 (3)

 

Leave a Reply

(*) Required, Your email will not be published