កូនប្រុស​និង​ក្មួយប្រុស​របស់​មេបញ្ជាកា​រ​រង ប៉េអឹម​រាជធានី​ភ្នំពេញ ដែល​ពាក់ព័ន្ធ​ករណី​ឆក់​ខ្សែក​ត្រូវ​ដោះលែង​ឲ្យ​នៅក្រៅ​ឃុំ​

, , Leave a comment

​រាជធានី​ភ្នំពេញ ៖ កូនប្រុស ​និង​ក្មួយប្រុស​របស់​មេបញ្ជាកា​រ​រង កងរាជអាវុធហត្ថ​រាជធានី​ភ្នំពេញ​ដែល​ត្រូវបាន​ចាប់ខ្លួន​ពាក់ព័ន្ធ​នឹង​ករណី ​ឆក់​ខ្សែ​កមាស ត្រូវបាន​ដោះលែង​កាលពី​យប់​ថ្ងៃ​៣០ ខែមេសា ឆ្នាំ​២០១៣ ក្រោម​លក្ខខណ្ឌ​ធានា​នៅក្រៅ​ឃុំ ពី​ក្រុមគ្រួសារ​របស់​ពួកគេ ដែលជា​រឿង មិន​សម​ទំនង ព្រោះ​វា​ជា​បទល្មើស​ព្រហ្មទណ្ឌ មិនអាច​ដោះលែង​ឲ្យ​នៅក្រៅ​ឃុំ​បានទេ ។​

 

 

មន្ត្រីនគរបាល​ខណ្ឌចំការមន បាន​បញ្ជាក់ថា​ឈ្មោះ លី សុ​ណាក់​ភ័​ក្ត្រា អាយុ​២១​ឆ្នាំ ជា​មន្ត្រី​ការិយាល័យ​ស្រាវជ្រាវ និង​យុត្តិធម៌​នៃ​បញ្ជាការ​កងរាជអាវុធហត្ថ​រាជធានី​ភ្នំពេញ ត្រូវជា​កូនប្រុស​លោក លី ខាត់​សាយ មាន​តួនាទី​ជា​មេបញ្ជាការរង​ប៉េអឹម​រាជធានី​ភ្នំពេញ និង​ក្មួយប្រុស​របស់គាត់​ឈ្មោះ ផែន បញ្ញា​រិ​ទ្ធិ អាយុ ២០​ឆ្នាំ​ជា​និស្សិត ត្រូវបាន​ដោះលែង​ឲ្យ​នៅក្រៅ​ឃុំ​ដោយ​ព្រះរាជអាជ្ញារង​សាលាដំបូង​រាជធានី​ ភ្នំពេញ​នៅ​ថ្ងៃទី​៣០ ខែមេសា ឆ្នាំ​២០១៣​។​

សមត្ថកិច្ច​បានបញ្ជាក់​ថា កាលពី​ថ្ងៃទី​២៧ ខែមេសា ២០១៣​នៅវេលា​ម៉ោង​ប្រហែល ២​រសៀល​ឈ្មោះ លី សុ​ណាក់​ភ័​ក្ត្រា និង​ឈ្មោះ ផែន បញ្ញា​រិ​ទ្ធិ បាន​បើក​ម៉ូតូ​ម៉ាក​ណៃ​ហ​ត​និង​បាន​ឆក់​ខ្សែក​មាស​ពី​ស្ត្រី​ម្នាក់ ខណៈដែល​នាង​កំពុងបើក​ម៉ូតូ​ទំនើប តាម​មហាវិថី​កម្ពុជា​ក្រោម ក្នុង​សង្កាត់​ទឹកល្អក់​២​ខណ្ឌទួលគោក នៅខាងមុខ​វិទ្យាល័យ​សន្ធរម៉ុក​។ បន្ទាប់ពី​ឆក់​ខ្សែក​ពួកគេ​បាន​បើក​ម៉ូតូ​គេចខ្លួន​និង​ចត​ម៉ូតូ នៅមុខ​មជ្ឈមណ្ឌល​រ៉ុ​ក ក្នុង​សង្កាត់​ទន្លេបាសាក់​ហើយ​ត្រូវបាន​ចាប់ខ្លួន​នៅ​ទីនោះ​ដោយ​នគរបាល ដោយ​ផ្អែក​តាម​ពាក្យបណ្តឹង របស់​នារី​ជា​ជនរងគ្រោះ​។​

បន្ទាប់ពី​ការចាប់ខ្លួន​ឈ្មោះ លី សុ​ណាក់​ភ័​ក្ត្រា និង​ឈ្មោះ ផែន បញ្ញា​រិ​ទ្ធិ នគរបាល​បាន​រឹបអូស​ម៉ូតូ​ម៉ាក​ណៃ​ហ​ត​ដែល​ពាក់​ស្លាក​លេខ​យោធា ប៉ុន្តែ​ខ្សែ​កមាស​ដែល​ពួកគេ​ឆក់​មិន​រកឃើញ​នោះទេ​ដោយសារ​ពួកគេ​បាន​ឲ្យ​វា ទៅ​ជនសង្ស័យ​ពីរ​នាក់​ផ្សេងទៀត ដែល​បាន​រត់គេចខ្លួន ហើយ​ឥឡូវ នគរបាល​កំពុង​ស្រាវជ្រាវ​ស្វែងរក​ចាប់ខ្លួន​ពួកគេ ដើម្បី​នាំមក​កាត់ទោស​ទៅតាម​ច្បាប់​។ ករណី​ដែល​ឈ្មោះ លី សុ​ណាក់​ភ័​ក្ត្រា និង​ឈ្មោះ ផែន បញ្ញា​រិ​ទ្ធិ ចេញ​ប្រព្រឹត្ត​បទល្មើស ហើយ​ត្រូវ​ដោះលែង​ឲ្យ​មាន​សេរីភាព​វិញ​នោះ នាំ​ឲ្យ​មានប្រតិកម្ម ពី​សាធារណជន និង​មានការ ទាមទារ​ឲ្យ​នាំ​ឈ្មោះ លី សុ​ណាក់​ភ័​ក្ត្រា និង​ឈ្មោះ ផែន បញ្ញា​រិ​ទ្ធិ មក​ឃុំខ្លួន ដើម្បី​ជំនុំជម្រះ ទោស​តាមផ្លូវ​ច្បាប់ ៕

6-May

ប្រភព វត្ត​ភ្នំ

 

Leave a Reply

(*) Required, Your email will not be published