យាយ​ព្រឿង ទទួលបាន​ភ្លើង​ខៀវ​ពី​ជំនាញ​រដ្ឋបាល​ព្រៃឈើ​ក្នុង​ការរកស៊ី​ដឹកជញ្ជូន​ឈើ​ខុសច្បាប់​ផ្តាច់មុខ​នៅ​ស្ទឹងត្រែង​

, , Leave a comment

​ខេត្តស្ទឹងត្រែង ៖ ច្រើន​ឆ្នាំ​មកហើយ ដែល​គ្រប់ៗ​គ្នា​ស្គា​ល់ពី​ឥទ្ធិពល​និង​អំណាច​របស់​យាយ​ព្រឿង​ដែលជា​មេ​ឈ្មួញ​ជនជាតិ​យួន​ក្នុង​ការរកស៊ី​ដឹកជញ្ជូន​ឈើ​ប្រណីត​ទាំង​តាម​ផ្លូវទឹកនិង​តាម​ផ្លូវគោក​ផ្តាច់មុខ​ដោយសារតែ​ជំនាញ​រដ្ឋបាល​ព្រៃឈើ​បើកភ្លើង​ខៀវ ឲ្យ​យាយ​ព្រឿង​ធ្វើ​អ្វីៗ​តាមតែ​អំពើ​ចិត្ត​គ្មាន​ការបង្ក្រាប​ទាល់តែសោះ​បើទោះបីជា​លោក​រដ្ឋមន្ត្រី ច័ន្ទ សារុន ធ្លាប់បាន​អួតអាង​ថា​ខេត្តស្ទឹងត្រែង​គឺជា​គោល ដៅ​ធំ​ទី​២​ដែល​ត្រូវ​បង្ក្រាប​ជំនួញ​ឈើ​ប្រណីត​ខុសច្បាប់​ឲ្យ​មាន​ប្រសិទ្ធភាព បន្ទាប់ពី​ខេត្តព្រះវិហារ​ក៏ដោយ ក៏​យាយ​ព្រឿង​នៅតែ​ធ្វើ​សកម្មភាព​លួច​ដឹកជញ្ជូន​ឈើ​ប្រណីត​ខុសច្បាប់ យ៉ាង​អនាធិបតេយ្យ​ដូច​មុន​ដដែល​។​

 

​សេចក្តីរាយការណ៍​ពី​ខេត្តស្ទឹងត្រែង​បាន​ឲ្យ​ដឹងថា យាយ​ព្រឿង​មិន ចេះ​និយាយ​ភាសា​ខ្មែរ​ក៏ពិតមែន ប៉ុន្តែ​យាយ​ព្រឿង​មាន​ដៃជើង​គ្រប់​ប្រភេទ ទាំង​មន្ត្រី​ជំនាញ​រដ្ឋបាល​ព្រៃឈើ កម្លាំងប្រដាប់អាវុធ និង​អ្នកកាសែត​មួយចំនួន​ក៏​សុទ្ធតែ​ត្រូវបាន​យាយ​ព្រឿង​ប្រើប្រាស់​ដើម្បី​សម្របសម្រួល​ការងារ​ក្នុងការ​ដឹកជញ្ជូន​ឈើ​របស់គាត់​ឲ្យ​មាន​ភាពរលូន​ល្អ​ចៀស​ផុតពី​ឧបសគ្គ​ផងដែរ ហើយ​ប៉ុន្មាន​ថ្ងៃ​មុននេះ មាន​អំពើ​កុងកាច់​គ្នា​ក្នុង​ជួរ​សមត្ថកិច្ច​ក៏មាន​ការ​បំបែក​ព័ត៌មាន​ពី​ជំនួញ​ឈើ​ខុសច្បាប់​ទ្រង់ទ្រាយ​ធំ​របស់​យាយ​ព្រឿង ជា​បន្តបន្ទាប់​។ លោក​រដ្ឋមន្ត្រី ច័ន្ទ សារុន ជាពិសេស​លោក ឆេង គឹម​ស៊ុន ជា​ប្រធាន​រដ្ឋបាល​ព្រៃឈើ ប្រសិនបើ​មាន​ឆន្ទៈ​ពិតប្រាកដ​ក្នុងការ​អនុវត្ត​បទបញ្ជា​លេខ​០១ ក្នុងការ​បង្ការ​បង្ក្រាប​និង​ទប់ស្កាត់​ការដឹកជញ្ជូន​ឈើ​ខុសច្បាប់​របស់​រាជរដ្ឋាភិបាល​មិនគួរ​មើលរំលង​ពី​ជំនួញ​ឈើ​ខុសច្បាប់​ទ្រង់ទ្រាយ​ធំ​របស់​យាយ​ព្រឿង​ដែល​កំពុង​ធ្វើ​សកម្មភាព​ដឹកជញ្ជូន ទាំង​តាម​ផ្លូវទឹក​និង​តាម​ផ្លូវគោក​សឹង​ផ្តាច់មុខ​ទៅហើយ​ក្នុង​ខេត្តស្ទឹងត្រែង​នោះទេ​។ ប្រសិនបើ​អាច​បង្ក្រាប​ជំ នួ​ញ​ឈើ​ខុសច្បាប់​របស់​យាយ​ព្រឿង បាន​ដោយ​ជោគជ័យ​នោះ គេ​យល់ថា​សកម្មភាព​កាប់បំផ្លាញ​ព្រៃឈើ​ខុសច្បាប់​នៅ​ភូមិភាគ​ឦសាន ជា​ពិ សេស​នៅ​ប៉ែក​ខាងជើង​នៃ​ខេត្តស្ទឹងត្រែង​ពិតជា​អាច​ទប់ស្កាត់​ដោយ​ប្រសិទ្ធភាព​ជាមិនខាន​។​

សេចក្តីរាយការណ៍​បាន​ឲ្យ​ដឹង​ទៀតថា យាយ​ព្រឿង​បាន​ដឹកជញ្ជូន​ឈើ​ប្រណីត​ខុសច្បាប់​ចេញ​តាម​ទូក​ពី​ស្រុក​សៀម​ប៉ាង និង​ស្រុក​សេ​សាន ចូលទៅ​ស្តុក​ទុក​ក្នុង​ឃ្លាំង​ដ៏​ធំ​មួយ​ក្បែរ​ផ្ទះ​របស់គាត់​កណ្តាល​ក្រុង​ស្ទឹងត្រែង គឺ​ធ្វើជា​ចំហ​មិនដែល​មានការ​បង្ក្រាប​ឬ​ទប់ស្កាត់​ពី​មន្ត្រី​ជំនាញ​នោះ ទេ ហើយ​ការដឹកជញ្ជូន​ឈើ​តាម​ទូក​របស់​យាយ​ព្រឿង មាន​ប្រភេទ​ឈើ​គ្រញូង បេង ធ្នង់ នាងនួន ក្នុង​មួយ​យប់ៗ​មក​គ្រប់​ទីកន្លែង​ចូក​មក​ក្រុង​ស្ទឹងត្រែង​រាប់សិប​ម៉ែត្រគូប ប៉ុន្តែ​មន្ត្រី​ជំនាញ​រដ្ឋបាល​ព្រៃឈើ​និង​សមត្ថ កិច្ច​ពាក់ព័ន្ធ​មិនដែល​ចាត់វិធានការ​បង្ក្រាប​ម្តងណា​ឡើយ​។ រៀងរាល់​យប់​ប្រជាពលរដ្ឋ​រក​ដឹក​ពួន​សឹង​មិនបាន​ដោយសារតែ​សំឡេង​ស្រែក​ហ៊ោ​ក​ញ្ជៀ​វ​របស់​កម្មករ ដែល​លើក​ឈើ​ចេញពី​ទូក​ទម្លាក់​នៅ​ចំណុច​ច្រាំងទន្លេ​មេគង្គ ខាងក្រោយ​ផ្ទះ​យា យ​ព្រឿង ដែល​ស្ថិតនៅ​ភូមិ​បា​ចុង សង្កាត់​ព្រះបាត ក្រុង​ស្ទឹងត្រែង ហើយ​ក្រោយពី​ប្រមូល​ឈើ​ស្តុក​ទុក​រួចហើយនោះ យាយ​ព្រឿង​បាន​បន្ត​ដឹកជញ្ជូន​តាម​រថយន្ត​កូរ៉េ ឬ​តាម​រថយន្ត​យី​ឌុប ទៅ​ចែកចាយ​តាម​សិប្បកម្ម​នានា​នៅ​ទូទាំង​ខេត្តស្ទឹងត្រែង​។ ជា​ទៀងទាត់​យាយ​ព្រឿង​តែងតែ​ដឹកជញ្ជូន​ឈើ​ចេញទៅ​ស្រុក​យួន ដោយ​ឆ្លងកាត់​ខេត្តក្រចេះ មិន​ដែលមាន​ឧបសគ្គ​អ្វី​ទេ ព្រោះ​ជំនាញ​រដ្ឋបាល​ព្រៃឈើ​និង​កងកម្លាំងប្រដាប់អាវុធ​មួយចំនួន​ជា​អ្នក​ជួយ​សម្របសម្រួល​បើកភ្លើង​ខៀវ​ឲ្យ​យាយ​ព្រឿង​ដឹកឈើ​ខុសច្បាប់​តាមចិត្ត​។​

យាយ​ព្រឿង​ក៏មាន​បង​ម្នាក់ទៀត​ឈ្មោះ​យាយ បូ​ន ដែលមាន​សិប្បកម្ម​កែច្នៃ​ឈើ​ដ៏​ធំ​នៅក្បែរ​ឃ្លាំង​ស្តុក​ឈើ​របស់​យាយ​ព្រឿង ហើយ​យាយ​បូ​ន ចាំ​ទទួល​ទិញ​ឈើ​ដែល​ក្រុម​ឈ្មួញ​តូចតាច​ដឹកជញ្ជូន​ឈើ​ខុសច្បាប់​មកពី​តំបន់​ផ្សេងៗ យកមក​ស្តុក​ទុក​សម្រាប់​នាំចេញ​ទៅ​ស្រុក យួន​ឬ​ចែកចាយ​ទៅ​ឲ្យ​សិប្បកម្ម​ដទៃ ទៀត​ដោយ​គ្មាន​ច្បាប់ទម្លាប់​អ្វី​ឡើយ​។ ជំនួញ​ឈើ​ខុសច្បាប់​របស់​យាយ​ព្រឿង​ដែល​គ្មាន​នរណា​ហ៊ាន​បង្ក្រាប ឬ​ហ៊ាន​ហើបមាត់ ត្រូវគេ​ដឹងថា​មាន​លោក អី​ុ​វ ឯក​សាវ​ត្តី ជា​នាយ​ខណ្ឌ​រដ្ឋបាល​ព្រៃឈើ​ខេត្តស្ទឹងត្រែង​ជា​អ្នក​ជួយ​សម្របសម្រួល ហើយ​គេ​សង្ស័យថា យាយ​ព្រឿង​ជា​អ្នកផ្តល់​ផលប្រយោជន៍​ឲ្យ​លោក អី​ុ​វ ឯក សាវ​ត្តី យ៉ាងច្រើន​ក្នុង​មួយខែៗ​ទើប​ទីតាំង​ស្តុក​ឈើ​ខុសច្បាប់ ឬ​ការដឹកជញ្ជូន​ឈើ​ទាំង​តាមផ្លូវ​ទឹក​និង​ផ្លូវគោក​របស់​យាយ​ព្រឿង​មិនដែល​មាន ការត្រួតពិនិត្យ ឬ​បង្ក្រាប​ពី​មន្ត្រី​ជំនាញ​និង​សមត្ថកិច្ច​ពាក់ព័ន្ធ​៕​

 camb_chansarun_soysophea_20100729-453x304

07

ប្រភព មនសិការ

 

Leave a Reply

(*) Required, Your email will not be published