តារាចម្រៀង​ប្រចាំ​ផលិតកម្ម​ថោ​ន ករុណា ពេជ្រ ទិញ​ផ្ទះ​វីឡា​តម្លៃ​ជាង ៤១ ម៉ឺន​ដុល្លារ​អាមេរិក​

, , Leave a comment

ភ្នំពេញៈ បន្ទាប់ពី​ប្រថុយ​បោះជំហាន​ចូល​ផលិតកម្ម​ថោ​ន កាលពី​ដំបូង​នោះ នៅពេលនេះ ផលិតកម្ម​ថោ​ន ពិតជា​អាច​លើក​មុខមាត់​តារាចម្រៀង ករុណា ពេជ្រ បាន​ដូច​បំណង​មែន​ពោលគឺតារា​ដែលមាន​អតីតកាល​នៅក្នុង​ផលិតកម្ម​ក្លា​ស៊ី​ក​រូបនេះ​បាន​សាង​កេរ្តិ៍​លេចធ្លោ​តែម្តង ក្រោម​ពាក្យ​លេច​ឮថា តារា​រូបនេះ​ទទួល​ការ​ជ្រោមជ្រែង​ខ្លាំង​នៅ​ទ្រនំ​ថ្មី​មួយ​នេះ​។​

 

​ទន្ទឹមគ្នា​នឹង​ភាពជោគជ័យ​នោះ គេ​សង្កេតឃើញថា តារាចម្រៀង​រូបនេះ​បាន​ឡើង​កាលី​ប​ជិះ​រថយន្ត​ទំនើប​ម៉ាក​ប្រា​ដូ និង​អាចមាន​លទ្ធភាព​ទិញ​ផ្ទះ​វីឡា​ភ្លោះ​មួយកន្លែង​ស្ថិតក្នុង​បុរី​ពិភពថ្មី​មានតម្លៃ​ប្រមាណ​២០​ម៉ឺន​ដុល្លារ​ធ្វើ​មិនដឹង​ទៀតផង​។ ចម្ងល់​បាន​កើតមានឡើង​ភ្លាមៗ​ផងដែរ​ថា តើ​កញ្ចប់​ប្រាក់​ដ៏​ធំ​រាប់ម៉ឺន​ដុល្លារ​ទាំងនោះ​មាន​ប្រភព​មកពីណា​មកពី​សិល្បៈ ឬក៏​មានការ​ឧបត្ថម្ភ​អ្វីមួយ​?

 

​ប៉ុន្តែ​យ៉ាងណា​តារា​រូបនេះ​ក៏​មិនបាន​ឲ្យ​ចម្ងល់​នោះ​អណ្តែតត្រសែត​គ្មាន​ចម្លើយ​ដែរ ពោលគឺ​កន្លង ករុណា ពេជ្រ បានចេញ​មុខមក​បញ្ជា​ក់ថា ប្រាក់​ទាំងនោះ​បានមកពី​សិល្បៈ​របស់លោក​មួយ​ភាគ និង​បានមកពី​ទ្រព្យ​ឪពុកម្តាយ​មួយ​ភាគ​ធំ​ខណៈ​ម្តាយ​ឪពុក​របស់លោក​ក៏​ជា​អ្នកជំនួញ​មានទ្រព្យ​មិនធម្មតា​នោះ​។​

 

​យ៉ាងណាមិញ​ផ្ទះ​មានតម្លៃ​២០​ម៉ឺន​ដុល្លារ ពិតជា​មិនធម្មតា​ទេ​សម្រាប់​ពលរដ្ឋ​កម្ពុជា​ថ្នាក់កណ្តាល តែ​សម្រាប់ ករុណា ពេជ្រ ត្រូវបាន​គេ​មើលឃើញថា វា​ហាក់បីដូចជា​រឿង​កំប៉ិកកំប៉ុក​មួយ​ប៉ុណ្ណោះ ខណៈ​នៅពេលនេះ​មាន​ប្រភពព័ត៌មាន​មួយ​បាន​ទម្លាយ​រឿង​ក្រោយខ្នង​តារាចម្រៀង​តួឯក​នៅក្នុង​ផលិតកម្ម​ថោ​ន​រូបនេះ​ថា រូបគេ​បានដាក់​ជួល​ផ្ទះ​ដែលមាន​តម្លៃ​២០​ម៉ឺន​ដុល្លារ​នោះ​ឲ្យ​គេ​ហើយ ដោយសារតែ​រូបគេ​ឡើង​កាលី​ប​ទិញ​ផ្ទះ​វីឡា​មួយកន្លែង​ទៀត​ដែលមាន​តម្លៃ​ប្រមាណ​៥០​ម៉ឺន​ដុល្លារ​ឯណោះ​។​

 

​ផ្ទះ​វីឡា​នោះ​ក៏​ត្រូវបាន​គេ​ដឹងផង​ដែរ​ថា មាន​ទំហំ​ធំ​ប្រមាណ​២០​ម៉ែត្រ​គុណ​នឹង​៣០​ម៉ែត្រ​ហើយ​វីឡា​នោះ​ក៏​ស្ថិតនៅ​មិន​ឆ្ងាយ​ពី​ផ្ទះ​វីឡា​ភ្លោះ​ចាស់​នៅ​បុរី​ពិភព ថ្មី​នោះដែរ​។ ចំពោះ​ការទិញ​ផ្ទះ​វីឡា​ថ្មី​នេះ ករុណា ពេជ្រ បានទទួល​ស្គាល់ ប៉ុន្តែ​លោក​បាន​បញ្ជាក់ថា ផ្ទះ​វីឡា​ភ្លោះ​ចាស់​របស់លោក​មិនទាន់​បានដាក់​ជួល​ដូច​គេ​និយាយ​នោះទេ​។​

 

​តារាចម្រៀង​ឆ្អឹងខ្នង​របស់​ផលិតកម្ម​ថោ​ន​រូបនេះ​ឲ្យ​ដឹងថា​៖« ខ្ញុំ​អត់​ដឹងថា ព័ត៌មាន​គេ​ថា ខ្ញុំ​ជួល​ផ្ទះ​នោះ​មាន​ប្រភព​ចេញ​មកពីណា​ទេ តាមពិត​ផ្ទះ​នោះ​ខ្ញុំ​នៅ​រាល់ថ្ងៃ អត់​ទាន់​បានដាក់​ជួល​នោះទេ តែ​រឿង​ថា ទិញ​ផ្ទះ​នោះ ខ្ញុំ​ពិតជា​បាន​ទិញ​ផ្ទះ​វីឡា​ថ្មី​មែន គ្រាន់តែ​ផ្ទះ​នោះ​កំពុងស្ថិត​នៅក្នុង​ការសាងសង់​នៅឡើយ នៅ​ម្តុំ​ជិត​សំរោង​អណ្តែត​ហ្នឹង​ដែរ​»​។​

 

​ជា​បុរស​ដើមទ្រូង​ប្រាំ​ហត្ថ ករុណា ពេជ្រ ពិតជា​ចិត្តសឿង​មែន រូបគេ​បានបញ្ជាក់​ឲ្យ​ដឹងថា ផ្ទះ​វីឡា​ដែល​លោក​ទិញ​នោះ​មានតម្លៃ​ជាង​៤០​ម៉ឺន​ដុល្លារ​តែ​យ៉ាងណា​លោក​បញ្ជាក់ថា ផ្ទះ​វីឡា​នោះ​ជា​ផ្ទះ​ទិញ​បង់​រំលស់​តែប៉ុណ្ណោះ បើ​ផ្ទះ​យកប្រាក់​ទាំង​ដុំ​ទៅ​ទិញ​លោក​ក៏​មិន​ហ៊ាន​ថ្លើមធំ​ទិញ​ផ្ទះ​តម្លៃ​កប់​ពពក​នោះដែរ​។​

 

​តារាចម្រៀង​ដែល​ចាប់​អាជីព​សិល្បៈ​តាមរយៈ​ការប្រឡង​ជាប់​ចំណាត់ថ្នាក់​លេខ​មួយ​ក្នុង​កម្មវិធី​តារា ណេ​ស​ស្លេ ( Nestle) នៅ​ឆ្នាំ​២០០៥ ករុណា ពេជ្រ បាន​និយាយថា​៖«​ផ្ទះ​វីឡា​ដែល​ខ្ញុំ​ទិញ​នោះ ខ្ញុំ​មិនដឹង​គេ​ដឹង​មកពីណា​ថា តម្លៃ​៥០​ម៉ឺន​ដុល្លារ​ទេ តាមពិត​ទៅផ្ទះ​នោះ​ស្អាត​ល្អ​ប្រណីត​ណាស់​មានតម្លៃ​៤១​ម៉ឺន​ដុល្លារ​អាមេរិក ហើយ​ផ្ទះ​នោះ​គឺ​ទិញ​បង់​រំលស់​ទេ បើ​មិន​ដូច្នេះ​ខ្ញុំ​ក៏​មិន​ហ៊ាន​ដែរ​។ នៅ​២​ឆ្នាំ​ដំបូង​គេ​តម្រូវ​ឲ្យ​យើង​បង់​១​ខែ​៦០០០​ដុល្លារ ហើយ​បន្ទាប់ពីនោះ គឺ​យើង​អាច​បង់​តាម​លទ្ធភាព​ដែល​យើង​មាន​ប៉ុន្មាន​ឆ្នាំ​ក៏បាន​»​។​

 

​ការបង់​រំលស់​មួយខែ​៦០០០​ពាន់​ដុល្លារ គឺជា​រឿង​មិនធម្មតា​ឡើយ តើ ករុណា ពេជ្រ អាចមាន​លទ្ធភាព​ដល់​ថ្នាក់​មួយខែ​បង់​៦០០០​ដុល្លារ​ទេ​? តារាចម្រៀង ករុណា ពេជ្រ បាន​ឆ្លើយ​ភ្លាម​ថា លោក​អាច​បង់​បាន​។ ពេជ្រ បាន​និយាយថា​៖«​តាម​ចំណូល​ខ្ញុំ​សព្វថ្ងៃ ខ្ញុំ​ពិតជា​អាច​បង់​បាន ព្រោះ​តម្លៃ​ខ្លួន​ខ្ញុំ​ច្រៀង​តាម​ខេត្ត​ជាង​១០០០​ដុល្លារ​ហើយ​មួយខែៗ ខ្ញុំ​អាច​ច្រៀង​បានជា​ច្រើន​កម្មវិធី​។ ម្យ៉ាង​ខ្ញុំ​ជា​កូនពៅ ម្តាយ​ខ្ញុំ​ក៏​ជា​អ្នកជំនួញ​ដែរ​ដូច្នេះ​ខ្ញុំ​អាច​បង់​បាន​។ ដំបូង​ប្រាក់​នោះ​ខ្ញុំ​ចង់​ប្តូរ​ឡាន​ទេ តែ​ម៉ាក់​ខ្ញុំ​ប្រាប់ថា ឲ្យ​ទិញ​ផ្ទះ​ទៅ ខ្ញុំ​ក៏​ទិញ​តាម​គាត់​តែម្តង​»៕​

28 (5) 28 (4) 28 (3)

ប្រភព postkhmer

 

Leave a Reply

(*) Required, Your email will not be published