ប្រធាន​សាខាគយ​ខេត្តកំពង់ចាម ប្រើតែ​លេខា​ជំនិត​ឈ្មោះ កូ សាំង​ស៊ីន ឲ្យ​ចាត់ចែង​ប្រមូល​លុយ​

, , Comment closed

ខេត្តកំពង់ចាម ៖ លោក ឃុន រ៉ា​ន់ ជា​ប្រធាន​សាខាគយ​និង​រដ្ឋាករ​ខេត្តកំពង់ចាម មាន​ជំនាញ​ប្រមូល​លុយ​ពី​ការដឹកជញ្ជូន​ទំនិញ​ខុសច្បាប់​រាប់ទាំង​ការដឹកជញ្ជូន​ឈើ​ឆ្លងកាត់​ខេ​ត្ក​កំពង់ចាមដោយ​គ្មាន​ការយោគយល់​ចំពោះ​ឈ្មួញណា​ម្នាក់​ឡើយ​។ ប៉ុន្តែ​សម្រាប់​ឈ្មួញ​មួយចំនួន​ដែលជា​បក្ខពួក​របស់គាត់​ដែល​ធ្លាប់មាន​ទំនាក់ទំនង​ក្នុងការ​បង់លុយ​ជាប់​ជាប្រចាំ អាច​រកស៊ី​ដឹកជញ្ជូន​ទំនិញគេចពន្ធ ឬ​ទំនិញ​ខុសច្បាប់​ពី​ព្រំដែន​យួន មក​រាជធានី​ភ្នំពេញ​យ៉ាង​រលូន​ល្អ​មិន​ដែលមាន​ឧបសគ្គ​អ្វី​ឡើយ​។​

​មន្ត្រី​តូចតាច​មួយចំនួន​បាន​លើកឡើងថា បច្ចុប្បន្ននេះ លោក ឃុន រ៉ា​ន់ បាន​លើក​បន្តុប​តែ​លេខា​របស់គាត់​ម្នាក់​ឈ្មោះ កូ សាំង​ស៊ីន ឲ្យ​ចាត់ចែង​មន្ត្រី​គយ​ចុះ​ដាក់​ប៉ុស្តិ៍​ជជុះ​តាមផ្លូវ​សំខាន់ៗ​ដើម្បី​ប្រមូល​លុយ​ពី​ការដឹកជញ្ជូន​ទំនិញ​របស់​ក្រុម​ឈ្មួញ​ទាំង​ទំនិញ​ស្របច្បាប់ និង​ទំនិញ​ខុសច្បាប់​ជាពិសេស​គ្រប់​ករណី​ដឹកជញ្ជូន​ឈើ​ឆ្លងកាត់​ខេត្តកំពង់ចាម របស់​ឈ្មួញ​ទាំង​តូច​ទាំង​ធំ ទោះជា​ឈ្មួញ​ដែល​ជ្រក​ក្រោម​ស្បែក​ជា​កម្លាំងប្រដាប់អាវុធ ក៏​លោក កូ សាំង​ស៊ីន ទទួល​ភារកិច្ច​ប្រមូល​លុយដុំៗ​យកទៅ​ជូន​លោក ឃុន រ៉ា​ន់ ផងដែរ ហើយ​មន្ត្រី​គយ​ដទៃទៀត បានត្រឹមតែ​អង្គុយ​ស្ងាប​ក្នុង​សាខាគយ និង​ទទួលបាន​របប​ឧបត្ថម្ភ​បន្តិចបន្តួច​។

​កន្លងមក​លោក កូ សាំង​ស៊ីន បាន​អនុវត្តន៍​គោលការណ៍​របស់លោក ឃុន រ៉ា​ន់ ត្រង់​ដូច​បន្ទាត់​ក្នុងការ​ចាត់តាំង​មន្ត្រី​ឲ្យ​ចុះ​ដាក់​ប៉ុស្តិ៍​ជជុះ ក៏ដូចជា​ការប្រមូល​លុយ​ខែ​ពី​ក្រុម​ឈ្មួញ​រកស៊ី​ដឹកជញ្ជូន​ទំនិញគេចពន្ធ​ឬ​ទំនិញ​ខុសច្បាប់​មកពី​វៀតណាម តាម​ច្រក​ត្រពាំង​ផ្លុ​ង ច្រក​ដូង​៧​ដើម និង​ច្រក​ដូនរ័ត្ន ពោលគឺ​សកម្មភាព​ដឹកជញ្ជូន​ទំនិញគេចពន្ធ​តាម​រថយន្ត​យី​ឌុប​របស់​ក្រុម​ឈ្មួញ​ធំៗ​ដែលមាន​ខ្នងបង្អែក​ពេលខ្លះ​លោក ឃុន រ៉ា​ន់ បញ្ជា​ឲ្យ​មន្ត្រី​ប្រមូល​លុយ​ថ្លៃ​បាយ ប៉ុន្តែ​មិនសូវ​ហ៊ាន​កោសរូស​អ្វី​ទេ​។ ប៉ុន្តែ​សម្រាប់​ប្រជាពលរដ្ឋ​ដែល​ដឹកជញ្ជូន​គ្រឿង​អេតចាយ​កសិផល ឬ​ការ​នាំចូល​គ្រឿងចក្រ​មកប្រើប្រាស់ តាមរបៀប​គ្រួសារ ក៏ត្រូវ​លោក ឃុន រ៉ា​ន់ បង្ក្រាប​ក្រោមលេស​អនុវត្តន៍​បទបញ្ជា​រប​ស់​ថ្នាក់លើ ។

​លោក ឃុន រ៉ា​ន់ ក៏បាន​ចាត់តាំង​ឲ្យ​លោក កូ សាំង​ស៊ីន ប្រមូល​លុយ​ពី​មន្ត្រី​គយ​ដែលជា​របប​អប្បហារ ដែលជា​ប្រាក់​ភាគរយ​បានមកពី​ការពិន័យ ឬ​បង្ក្រាប​ទំនិញគេចពន្ធ​ក្រោមរូបភាព​ថា​ប្រមូល​លុយ​យកទៅ​ជូន​ថ្នាក់លើ ហើយ​រៀងរាល់​ចុងខែ​លោក កូ សាំង​ស៊ីន ត្រូវមាន​ភារកិច្ច​ប្រមូល​លុយ​ភាគរយ ឬ​កាត់​របប​ពី​មន្ត្រី​គយ​តូចតាច​ដោយ​មិន​រើសមុខ​យកទៅ​ប្រគល់ជូន​លោក ឃុន រ៉ា​ន់ ដែល​ត្រូវ​ឡើងមក​ប្រជុំ​នៅ​អគ្គនាយកដ្ឋាន​គយ​និង​រដ្ឋាករ ដើម្បី​រាយការណ៍​ពី​ប្រាក់ចំណូល​ប្រចាំខែ ក្នុង​សប្តាហ៍​ទី​១ រៀងរាល់ខែ​។ មានការ​បញ្ជាក់​ផងដែរ​ថា រថយន្ត​តូចៗ​ដែល​ដឹកទំនិញ​ស្របច្បាប់​គឺ​ត្រូវ​បង់ពន្ធ​នាំចូល​ពី​៤​ទៅ​៥​លាន​រៀល ប៉ុន្តែ​សម្រាប់​រថយន្ត​យី​ឌុប​ធំៗ​ដែល​ផ្ទុក​លើស​ទម្ងន់​បំផ្លាញ​ផ្លូវ​ស្ពាន​និង​បង់ពន្ធ​មិន​គ្រប់ ក្នុង​មួយ​រថយន្ត​ប្រមូល​ពន្ធ​បានត្រឹមតែ ១​ទៅ​៣​លាន​រៀល​ប៉ុណ្ណោះ ។​

​ចំពោះ​រថយន្ត​ដឹកជញ្ជូន​ទំនិញ​របស់​ឈ្មួញ​ធំៗ នៅ​ច្រក​ដូនរ័ត្ន ភាគច្រើន​ជា​ទំនិញ​គ្រឿង​ចាប់ហួយ គ្រឿង​អេឡិចត្រូនិក គ្រឿងសំណង់ ប៉ុន្តែ​ការបង់ពន្ធ​ជាក់ស្តែង​មាន​ចំនួន​តិចតួច​ប៉ុណ្ណោះ ពុំមាន​តុល្យភាព​ទាល់តែសោះ ទៅនឹង​សកម្មភាព​ដឹកជញ្ជូន​ទំនិញ​តាម​រថយន្ត​យី​ឌុប ផ្ទុក​លើស​ទម្ងន់ ។ ត្រង់ចំណុច​នេះ​បានបង្ហាញ​ឲ្យ​ឃើញ​ពី​ភាពមិនប្រក្រតី​នៃ​ការប្រមូល​ចំណូល​ពន្ធ​ដែល​គេ​សង្ស័យថា វា​ហូរ​ចូល​ហោប៉ៅ​មន្ត្រី​គយ​ពុករលួយ ច្រើនជាង​បង់​ចូល​ជា​ថវិកាជាតិ ហើយ​នៅមាន​សកម្មភាព​នាំចេញ​ឈើ​ប្រណី​តទៅ​វៀតណាម តាម​ច្រក​ត្រពាំង​ផ្លុ​ង និង​ច្រក​ដូង​៧​ដើម ដែលមាន​សកម្មភាព​ម​មា​ញឹក​ជាងគេ ទាំងយប់​ទាំង​ថ្ងៃ មិនដឹង​ជា​លោក ឃុន រ៉ា​ន់ ប្រមូលបាន​ផលប្រយោជន៍​បាន​កម្រិតណា​នោះទេ​។​

​លោក ឃុន រ៉ា​ន់ អាច​ក្តោប​ក្តាប់បាន​គ្រប់មុខ​សញ្ញា​រកស៊ី​ដឹកជញ្ជូន​ទំនិញ​ទាំង​ស្របច្បាប់​និង​ខុសច្បាប់​ក៏ដូចជា​ក្រុម​ឈ្មួញ​ដែល​រកស៊ី​ដឹកជញ្ជូន​ឈើ​ឆ្លងកាត់​ខេត្តកំពង់ចាម ដែល​ពេលខ្លះ​លោក ឃុន រ៉ា​ន់ មិនបាន​ចេញមុខ​ទៅ​ប្រមូល​លុយ​ពី​ក្រុម​ឈ្មួញ​ដោយផ្ទាល់​នោះទេ គ្រាន់តែ​គាត់​ប្រើប្រាស់​លេខា​ដ៏​មានអំណាច​ម្នាក់ គឺ​លោក កូ សាំង​ស៊ីន ឲ្យ​ទៅ​ប្រមូល​លុយ​ជំនួស​។ លោក ឃុន រ៉ា​ន់ ត្រូវបាន​ប្រជាពលរដ្ឋ ស្គាល់​ច្បាស់ តាមរយៈ​សកម្មភាព​បើករថយន្ត​ប្រដេញ​ឡាន​ដឹក​ប្រេង​គេចពន្ធ ហើយ​បុក​គ្នា​ផ្ទុះ​ឆេះ​លើ​ស្ពាន គី​ហ្សូ​ណា ព្រោះ​មុនពេល​ឡើង​ធ្វើជា​ប្រធាន​សាខាគយ​ខេត្តកំពង់ចាម លោក ឃុន រ៉ា​ន់ ជាប់​ឈ្មោះ​ជា​មន្ត្រី​គយ​ដែល​ពូកែ​កាប់​ដាវ​ប្រមូល​ផលប្រយោជន៍​ទៅ​ច្រក​ហោប៉ៅ​ផ្ទាល់ខ្លួន​៕

08-m