ហ្សូ​រី​ដា ទិញ​វីឡា​តម្លៃ​១៦​ម៉ឺន​ដុល្លារ​

, , Comment closed

រាជធានី​ភ្នំពេញ ៖ កាលពីដើមឆ្នាំ​២០១២ ពិធី​ការិនី​មាន​ប្រភព​មកពី​នារី​អាកាសចរណ៍​នាង ឌួង ហ្សូ​រី​ដា បាន​បង្ហើប​ឲ្យ​ដឹងថា នាង​មានបំណង​សាងសង់​ផ្ទះ​វីឡា​មួយកន្លែង​រួមគ្នា​ជាមួយនឹង​បុរស​ជា​គូស្នេហ៍ តែ​មិន​ប៉ុន្មាន​ផង​គេ​បានដឹងថាស្នេហា​នោះ​ក៏​ឈានដល់​ផ្លូវ​បញ្ចប់​។ ក្តី​ស្រមៃ​របស់​នាង​នៅពេលនោះ​ក៏បាន​រលត់​បាត់ តែ​នៅពេលនេះ​អ្នក​នៅក្នុង​សិល្បៈ​បានដឹងថា ហ្សូ​រី​ដា នឹង​អាច​សម្រេច​ក្តី​ស្រមៃ​បាន​ដោយសារ​មាន​ជំនួយ​ពី​ឧកញ៉ា​ម្នាក់​ខណៈ​នៅពេលនេះ គេ​ដឹងថា នាង​បាន​ចំណាយ​ប្រាក់​ទិញ​ផ្ទះ​វីឡា​មួយកន្លែង​ជា​កម្មសិទ្ធិ​ផ្តាច់​មុខរប​ស់​នាង​នោះ​។​

អ្នករស់នៅ​ក្នុងសង្គម​សិល្បៈ​ដែល​ស្និទ្ធស្នាល​នឹង​តារា​រូបនេះ​បានឱ្យដឹងថា ពិធី​ការិនី​ឯករាជ្យ​នាង ឌួង ហ្សូ​រី​ដា ទើបតែ​វេច​ប្រាក់​យកទៅ​ទិញ​ផ្ទះ​វីឡា​មួយកន្លែង ដែល​ផ្ទះ​នោះ​ត្រូវបាន​គេ​សង្ស័យថា​ជា​ការជួយជ្រោមជ្រែង​រប​ស់​ឧកញ៉ា​ម្នាក់ មានតម្លៃ​ជាង​១០​ម៉ឺន​ដុល្លារ​។ ប្រភព​ដដែល​បន្តថា ផ្ទះ​វីឡា​នោះ​មាន​ទទឹង​ប្រវែង​៦​ម៉ែត្រ បណ្តោយ​១២​ម៉ែត្រ និង​មាន​កម្ពស់​៣​ជាន់ ដែលមាន​ទីតាំង​ក្នុង​បុរី​មួយ​ស្ថិតនៅតាម​បណ្តោយ​ផ្លូវ​ជា សុផារ៉ា​។​

16-m (1)        

ប៉ុន្តែ​ពាក់ព័ន្ធ​នឹង​ការ​លើកឡើងថា តារា​សម្តែង​ដែល​វិ​វ​ត្តិ​ខ្លួន​ក្លាយជា​ពិធី​ការិនី​ល្បី​នាង ឌួង ហ្សូ​រី​ដា ទទួល​ឥទ្ធិពល​ទឹកប្រាក់​ពី​ឧកញ៉ា​ទ្រព្យ​ស្តុក​ម្នាក់​នោះ​មិនទាន់​និយាយ​ចប់​ផង ស្រាប់តែ​នាង ឌួង ហ្សូ​រី​ដា បានបញ្ជាក់​ប្រាប់​យ៉ាង​ដាច់ខាត​ថា អ្វីៗ​នាង​ប្រឹងប្រែង​ដោយ​ខ្លួនឯង មិនមាន​ការឧបត្ថម្ភ​ពី​ឧកញ៉ា​ណា​ម្នាក់​ឡើយ​។​

​ពិធី​ការិនី​ឈរ​តំណែង​កំពូល​នាង ឌួង ហ្សូ​រី​ដា និយាយថា​៖«​ខ្ញុំ​បាន​ទិញ​វីឡា​មែន មានតម្លៃ​១៦​ម៉ឺន​ដុល្លារ គឺ​ខ្ញុំ​ទិញ​ដោយ​បង់​រំលស់​ដោយ​លុយ​ដែល​ខ្ញុំ​បានមកពី​សិល្បៈ​។ បើទោះបីជា​ហៅ​ខ្ញុំ​ទៅ​ស្បថ​នៅ​កន្លែង​ស័ក្តិសិទ្ធិ​ណា ក៏​ខ្ញុំ​ហ៊ាន​ដែរ ខ្ញុំ​មិនបាន​ទទួល​មួយ​កាក់ មួយ​សេន​ណា​ពី​ឧកញ៉ា​ណា​ម្នាក់​ឡើយ​»​។​

​អ្នកមាន​ទំនាក់ទំនង​ល្អ​ជាមួយនឹង​តារា​រូបនេះ​ឲ្យ​ដឹង​បន្ថែមថា ផ្ទះ​នោះ​នាង​បាន​ចាត់ចែង​ទិញ​តាំងពី​ចុងឆ្នាំ​២០១២​មកម្ល៉េះ ហើយ​គេហដ្ឋាន​ដែល​គេ​និយម​ហៅថា វីឡា​ភ្លោះ​នេះ មាន​ដាក់ឈ្មោះ​នាង​ផ្ទាល់​តែម្តង​ពោលគឺ​ផ្ទះ​នេះ​ជា​កម្មសិទ្ធិ​របស់​នាង​ផ្តាច់មុខ​។ តែ​ទោះជា​យ៉ាងណា​គេ​បានដឹងថា ផ្ទះ​វីឡា​នោះ​ស្ថិតនៅ​ក្នុងករណី​បង់​រំលស់ ហើយ​នាង​ទិញ​តាំងពី​ផ្ទះ​នោះគេ​កំពុង​បុកគ្រឹះ​ឯណោះ​។​

​ជាមួយនឹង​សមិទ្ធផល​ដ៏​ធំ​ដែល​បាន​កើតមានឡើង​នៅពេលនេះ មិត្តភក្តិ​របស់​តារា​រូបនេះ​ដែលជា​មាន​អាជីព​តែមួយ​ដែរនោះ បាន​ប្រាប់​បន្តទៀតថា ផ្ទះ​របស់ ហ្សូ​រី​ដា ទើប​សាងសង់ បាន​ប្រហែល​៣០​ភាគរយ​ប៉ុណ្ណោះ ហើយ​ការសាងសង់​គ្រោង​នឹង​បញ្ចប់​ការ​ដំណើរ​នៅ​ចុងឆ្នាំ​២០១៣ ឬ​បើ​យឺត​នៅ​ដើមឆ្នាំ​២០១៤​។​

​មានការ​និយាយ​តាមបែប​ខ្សឹបខ្សៀវ​ថា ការចំណាយ​ប្រាក់​សម្រាប់​ការទិញ​ផ្ទះ​វីឡា​ស្តុកស្តម្ភ​នេះ ឌួង ហ្សូ​រី​ដា មិនចាំបាច់​ខ្វល់​នឹង​ការរក​ប្រាក់​នោះឡើយ ពោលគឺ​ការទិញ​វីឡា​ធំ​ទ្រនំ​ខ្ពស់​នេះ​ឧកញ៉ា​ម្នាក់​ដែល​គេ​ឧស្សាហ៍​ឃើញ​មាន​វត្តមាន​ជាមួយនឹង ឌួង ហ្សូ​រី​ដា ជា​អ្នក​ទិញដូរ​ឲ្យ​នាង​ដើម្បី​ជាការ​ពង្រឹង​ទំនាក់ទំនង​ស្នេហា​មួយ​នេះ​។ ប៉ុន្តែ ឌួង ហ្សូ​រី​ដា កាន់តែ​បដិសេធ​ចំពោះ​រឿងនេះ​។​

​ហ្សូ​រី​ដា ទទួលស្គាល់ថា នាង​ពិតជា​ស្គាល់​ឧកញ៉ា​ម្នាក់​ដែល​គេ​លើក​យកមក​និយាយ​មែន ប៉ុន្តែ​នាង និង​ឧកញ៉ា​ម្នាក់​នោះ មិន​ជាប់​ពាក់ព័ន្ធ​សូម្បី​បន្តិច​ឡើយ ហើយ​អ្វីដែល​គេ​ធ្លាប់​ឃើញ​នាង​មាន​វត្តមាន​ជាមួយ​ឧកញ៉ា​នោះ ក៏​ព្រោះតែ​ក្នុង​ទំនាក់ទំនង​ការងារ​ប៉ុណ្ណោះ​។​

​នាង​បាន​និយាយថា​៖« បើ​ខ្ញុំ​មាន​ស្នេហា​ជាមួយ​ឧកញ៉ា​មែន ម្ល៉េះ​ខ្ញុំ​ក៏​មិន​ប្រឹង​ធ្វើ​ការងារ​ត្រដាបត្រដួស​បែបនេះ​ដែរ​ប្រហែល​ខ្ញុំ​មាន​ប្រាក់​ចាយ​មិន​ខ្វះ​ហើយ​រស់នៅ​ក្នុងផ្ទះ​ស្តុកស្តម្ភ​មិន​ខាន​»​។​

         ​តារា​ស្រី​រូបនេះ​បាន​បញ្ជាក់ថា​៖«​ក្រៅពី​ការងារ​សិល្បៈ ខ្ញុំ​មានមុខ​របរ​ដែល​ខ្ញុំ​អាច​ពឹងពាក់​បាន​ខ្ញុំ​មាន​ក្តី​ស្រមៃ​មួយ​គឺ​រស់នៅ​ដោយ​ភាពថ្លៃថ្នូរ​ជាមួយ​គូស្នេហ៍​ពិតប្រាកដ មិនមែនជា​ស្នេហា​លួចលាក់​ជាមួយ អ្នកណាម្នាក់​ទេ​»៕

16-m (2) ប្រភព postkhmer​