ព្យុះភ្លៀង​និង​រន្ទះ នៅ​ខេត្ដ​ព្រះវិហារ ក្រចេះ បន្ទាយមានជ័យ សម្លាប់​មនុស្ស​និង​ខូចខាត​ផ្ទះ​ជាច្រើន​ខ្នង​

, , Comment closed

         រាជធានី​ភ្នំពេញ ៖ ព្យុះភ្លៀង​និង​រន្ទះ​ខ្លាំងៗ នៅ​ខេត្ដ​ព្រះវិហារ ខេត្ដ​ក្រចេះ និង​ខេត្ដ​បន្ទាយមានជ័យ កាលពី​ថ្ងៃទី​១៤ ខែមីនា ឆ្នាំ​២០១៣ បណ្ដាលឱ្យ​ប្រជាពលរដ្ឋ​ខ្មែរ​ចំនួន​៤​នាក់ ស្លាប់ ដោយសារ​ផ្ទះ​សង្កត់​លើ ដោយសារ​រន្ទះបាញ់ និង​មនុស្ស ៤​នាក់​ផ្សេងទៀត រងរបួស ព្រមទាំង​ផ្ទះ​ប្រជាពលរដ្ឋ​ប្រមាណ ៤០០​ខ្នង បាន​រង​ការខូចខាត ក្នុងនោះ​មាន ដួលរលំ​ទាំងស្រុង និង​ប៉ើង​ដំបូល ។​

         ​សម្រាប់​ខេត្ដ​ព្រះវិហារ​មាន​គ្រោះធម្មជាតិ ដែល​បណ្ដាលមកពី​ភ្លៀង​លាយ​ខ្យល់ ប្រមាណ​៣០​នាទី​ខាង កាលពី​រសៀល​ថ្ងៃទី​១៤ ខែមីនា ឆ្នាំ​២០១៣ ស្ថិត នៅ​ភូមិ​ស្រអែម​ខាងជើង ឃុំ​ស្រអែម ស្រុក ជាំ​ក្សាន្ដ ខេត្ដ​ព្រះវិហារ ផ្ទះ​ប្រជាពលរដ្ឋ​ជាង​៥០​ខ្នង បាន​ដួលរលំ និង​ប៉ើង​ដំបូល ព្រមទាំង​សម្លាប់​ម្ដាយ និង​កូនប្រុស អាយុ​៨​ឆ្នាំ ដោយសារតែ​ផ្ទះ​សង្កត់​លើ ។ ស្ដ្រី​រងគ្រោះ​ជា​ម្ដាយ ឈ្មោះ កៅ សាវឿន អាយុ ៣៨​ឆ្នាំ និង​កូនប្រុស​ឈ្មោះ ខាន់ គឹម​សៀន អាយុ ៨​ឆ្នាំ ដោយសារតែ​ផ្ទះ​សង្កត់​លើ ។​

         ​ដោយឡែក​កាលពី​វេលា​ម៉ោង ៧ និង ៣០​នាទី​យប់ ថ្ងៃទី​១៤ ខែមីនា ឆ្នាំ ២០១៣ បាតុភូតធម្មជាតិ​ភ្លៀង​លាយ​ខ្យល់ ក៏បាន​កើតឡើង នៅ​ភូមិ​រោងចក្រ ភូមិ​ក្រសាំង និង​ភូមិ​គ្រង ក្នុង​ឃុំ​ស្នួល ស្រុក​ស្នួល ខេត្ដ ក្រចេះ បោក​ចំ​ផ្ទះ​ប្រជាពលរដ្ឋ​ចំនួន ៤៤ គ្រួសារ បណ្ដាលឱ្យ​ផ្ទះ​ប្រជាពលរដ្ឋ​ជិត​៥០​ខ្នង ដួលរលំ និង​ប៉ើង​ដំបូល ហើយ​សម្លាប់ បុរស​ម្នាក់ និង​រងរបួស ៣​នាក់​ផ្សេងទៀត​។ ក្នុងចំណោម ៤៤ គ្រួសារ​នោះ មានផ្ទះ​១ ខ្នង ស្ថិតក្នុង​ភូមិ​ក្បាល​ស្នួល ត្រូវបាន​ដើម​គគីរ បាក់​រលំ​សង្កត់​លើ បណ្តាល​ឲ្យ​មនុស្ស​ស្លាប់​ម្នាក់​ភ្លាមៗ និង​រងរបួស ៣ នាក់ ។​

         ​ជនរងគ្រោះ​ដែល​ស្លាប់បាត់​បង់ជីវិត​នោះ មានឈ្មោះ ស៊ីម ប៊ុ​ម​ធឹ​ម ភេទ​ប្រុស អាយុ ឲ​៤២ ឆ្នាំ មាន ឲ​ស្រុកកំណើត ភូមិ​តន​ឡង​ទី​៣ ឃុំ​ព្រៃខ្លា ស្រុក​ព្រៃវែង ខេត្តព្រៃវែង ជា​អ្នក​ចំណាក មក​កាប់ចំការ​ដាំ​ដំណាំ ត្រូវបាន​ក្រុមគ្រួសារ​ដឹកយក​ទៅ​ស្រុកកំណើត ដើម្បី​ធ្វើបុណ្យ​តាម​ប្រពៃណី ចំណែក​អ្នករងរបួស​ធ្ងន់​ស្រាល ត្រូវបាន​គេ​ដឹកបញ្ជូន ទៅ​សម្រាក​នៅ​មន្ទីរពេទ្យបង្អែក ខេត្តក្រចេះ  ។ អាជ្ញាធរ​ដែនដី បាន​ចុះទៅពិនិត្យ នៅ​កន្លែងកើតហេតុ​ជាក់ស្តែង និង​បាន​ចែក ជូន​នូវ​ថវិកា សម្ភារៈ គ្រឿងឧបភោគ បរិភោគ មួយចំនួន ដល់​ក្រុមគ្រួសារ​ជនរងគ្រោះ​ផងដែរ​។​

         ​ដោយឡែក​អាជ្ញាធរខេត្ត​បន្ទាយមានជ័យ​បានឱ្យដឹងថា ភ្លៀង​ខ្លាំង​លាយ​លំនឹង​ខ្យល់​ផង ចាប់ពី​ម៉ោង ៥​និង​៣០​រសៀល​រហូត ដល់​៧​យប់​ថ្ងៃទី​១៤ ខែមីនា ឆ្នាំ​២០១៣ បាន​បណ្តាល​ស្ត្រី​ម្នាក់​ស្លាប់​ដោយសារ​រ​ន្ទៈ​បាញ់ និង​ផ្ទះ​ជាង​២៩៦​ខ្នង​ទៀត រង​ការខូចខាត នៅក្នុង​ឃុំ​ចំនួន​៦ នៃ​ស្រុក​ស្វាយចេក និង​ស្រុក​ថ្មពួក​។ ឃុំ​បី​នៃ​ស្រុក​ស្វាយចេក​ដែល​ជួប​គ្រោះធម្មជាតិ មាន​ឃុំ ស្លក្រាម តា​បែន និង​តា​ភោ រីឯ​បី​ឃុំ​ទៀត​នៅ​ស្រុក​ថ្មពួក មាន​ឃុំ គំរូ ថ្មពួក និង​ឃុំ​ថ្មី​។ ជាមួយនឹង​គ្រោះមហន្តរាយធម្មជាតិ​នេះ គោយន្ត​ចំនួន​៥​គ្រឿង របស់​អ្នកភូមិ ដែល​ទុក​នៅក្រោម​ផ្ទះ ក៏ត្រូវ​ខូចខាត​ទាំងស្រុង​ដោយសារតែ​ផ្ទះ​សង្កត់​លើ​។ សមត្ថកិច្ច​បានបញ្ជាក់​ថា ស្ត្រី​ម្នាក់​ដែល​ស្លាប់​ដោយ​សាររ​ន្ទៈ​បាញ់ គេ​មិនទាន់​ដឹង អត្តសញ្ញាណ​នៅឡើយ​ទេ ៕

15-m