លី ច័ន្ទ​សីហា សង្វាត​ការងារ​សម្អាងការ​ជាង​សិល្បៈ​

, , Comment closed

         រាជធានី​ភ្នំពេញ ៖ បន្ទាប់ពី​បរាជ័យ​ចំណង​ស្នេហ៍​គ្រា​ដំបូង និង​ទទួល​បានការ​លួង​ចិត្ត​ពី​លោកឪពុក​ដោយ​ការបើក​សម្អាងការ​ជា​ថ្នូរ​នោះ ពីមួយ​ឆ្នាំទៅ​មួយឆ្នាំ​តារា​សម្តែង​រាង​ទាប​ទ្រនាប់​ចង្កា​ស្រួច​សម្បូរ​សាច់​ថ្ពាល់កញ្ញា លី ច័ន្ទ​សីហា តែងតែ​អះអាង​ពី​ភាពជោគជ័យ​ពី​ជំនួញ​ហើយ​មានពេលខ្លះ​នាង​ក៏​ឃ្លាតឆ្ងាយ​ពី​សិល្បៈ​ដោយសារ​ជំនួញ​នេះដែរ​។​

         ស្រី​រូប​ស្រស់​ចង្កា​ស្រួច​សម្បូរ​សាច់​ថ្ពាល់​កញ្ញា​លី ច័ន្ទ​សីហា កាលពី​ចុងខែ​កុម្ភៈ​កន្លងទៅនេះ​ត្រូវ​សាច់ញាតិ​ស្និទ្ធស្នាល​តែមួយគត់​របស់​នាង​កាលពី​ប៉ុន្មាន​ថ្ងៃមុន​នេះ​បាន​ប្រាប់​ឲ្យ​ដឹងថា នៅ​ឆ្នាំ​២០១៣​នេះ​សីហា​ទើបតែ​ឡើងទៅ​ប្រទេស​វៀតណាម​ដើម្បី​ទិញ​សម្ភារ​សម្អាងកា​រម​កព​ង្រឹ​ង​អាជីព​សម្អាងការ​របស់​នាង​បន្ថែមទៀត ខណៈ​ឆ្នាំ​២០១៣​នេះ​ក៏មាន​ភ្ញៀវ​មក​កក់​រោង​ក៏​ច្រើន​គួរសម​ហើយ​ដែរ​»​។ អ្នក​ជិតដិត​តារា​សម្តែង​ពូកែ​បង្ហូរទឹកភ្នែក​តាំងពី​វ័យក្មេង​បាន​អះអាង​ឲ្យ​ដឹងថា បន្ទាប់ពី​សម្អាង​ការកូន សីហា បើក​ដំណើរការ​ប៉ុន្មាន​ឆ្នាំ​មក​នោះ​នាង​ទទួលបាន​ជោគជ័យ​គួរសម​ខណៈដែល​សព្វថ្ងៃ​នេះ​មាន​អតិថិជន​នៅ​គ្រប់​ខេត្ត​ក្រុងមាន​ការគាំទ្រ​និង​ចូលចិត្ត​សម្អាងការ​នាង ហើយ​មានការ​ទាក់ទង​មក​កក់​ជា​ហូរហែ​ដែរ មិនដែល​ដាច់​បើ​សូម្បី​ក្នុង​រដូវវស្សា​ក៏មាន​មួយៗ​ដែរ​។​

         ​បើទោះជា​លោក សុខ ជុន ថ្លែង​លើក​ពី​មោទនភាព​នៃ​សម្អាងការ​របស់​កូនស្រី​យ៉ាង​ដូច្នេះ​ក្តី​ប៉ុន្តែ​លោក​មិន​បានដឹង​ពី​ទូរលេខ​ដែល​កូនស្រី​ទទួល​ការ​កក់​រោង​សម្រាប់​ឆ្នាំ​២០១៣​នេះ​ទេ ដោយ​លោក​បញ្ជាក់ថា​៖«​ដ្បិតថា​ខ្ញុំ​ជា​ឪពុក​នាង​និង​តែង​ដើរ​តាម​កូន​មែន​តែបើ​និយាយ​ពី​របរ​កូន​នោះ​ខ្ញុំ​ដូចជា​មិនដែល​បាន​សួរនាំ​កូន​ថា​ឆ្នាំនេះ​ទទួលបាន​ប៉ុន្មាន​រោង​នោះទេ តែ​គ្រាន់តែ​ដឹងថា​ឆ្នាំនេះ​នាង​មាន​គម្រោង​ពង្រីក​របរ​មួយ​នេះ​ឲ្យ​ធំ​ជាង​ឆ្នាំមុនៗ​»​។​

         ​បើ​និយាយ​ពី​ទេពកោសល្យ​សម្តែង​របស់ កញ្ញា លី ច័ន្ទ​សីហា នាង​មាន​បទពិសោធ​សិល្បៈ​តាំងពី​តូច ហើយ​ពេលនោះ​នាង​ក៏​ទទួលបាន​ការពេញនិយម​ពី​បណ្តា​ផលិតកម្ម​ផលិតភាព​យន្ត​ពិសេស​រឿង​បែប​មនោសញ្ចេតនា​កម្សត់ៗ​។​ប៉ុន្តែ​ប៉ុន្មាន​ឆ្នាំ​ចុង​ក្រោយនេះ​វត្តមាន​តារា​កំពូល​ទឹកភ្នែក នាង លី ច័ន្ទ​សីហា​ហាក់​មិនសូវ​លេច​វត្តមាន​ក្នុងការ​សម្តែង​ទេ​ពោលគឺ​ចាប់តាំងពី​នាង​បាក់បែក​គូ​ដណ្តឹង​នៅ​ឆ្នាំ​២០១០​មក​។ ជាងនេះទៅទៀត​គឺ​ចាប់តាំងពី​នាង​មាន​រូបរាង​ធាត់​បាត់​សម្រស់​មួយ​ភាគ​ធំ​មក​គឺ​ការងារ​សិល្បៈ​របស់​នាង​ក៏​មិនសូវមាន​ដែរ​។ ប្រហែលជា​ដូច្នេះហើយ​ទើប​នាង​ស្រវាស្រទេញ​នឹង​ការងារ​ក្រៅ​អាជីព​សិល្បៈ​ច្រើនជាង​បន្ទាប់ពី​នាង​សម្តែង​រឿង​ចុងក្រោយ​ឲ្យ​ផលិតកម្ម​មហាហង្ស​ក្នុង​រឿង «​អព្ភូតហេតុ​ស្នេហ៍​» ដែល​បាន​ចាក់ផ្សាយ​នៅ​ស្ថានីយទូរទស្សន៍​ប៉ុស្តិ៍​លេខ​៥​កាលពីពេល​កន្លងទៅ​។​

         ​ប៉ុន្តែ​យ៉ាងណា​តាមរយៈ​ការសម្តែង​រឿង​ចុងក្រោយ «​អព្ភូតហេតុ​ស្នេហ៍​»​នេះ កញ្ញា លី ច័ន្ទ​សីហា​មិនសូវ​ទទួលបាន​ការទា​ក់​ទាញ​ដូច​កាលដែល​នាង​សម្តែង​ក្នុង​រឿង «​មរណ​មាតា​» នោះឡើយ​ហើយ​ជាមួយ​ភាពអវិជ្ជមាន​នោះដែរ នាង​ក៏​ទទួលបាន​ការរិះគន់​ច្រើន​ពី​រឿង​រូបរាង​ធាត់​របស់​នាង​ដែល​មើលទៅ​បាត់បង់​សម្រស់​លែង​ស្អាត​ដូច​កាលពីមុន​។​

         តែ​ទោះជា​យ៉ាងណាក៏ដោយ​តារា​ស្រី​ដែល​ធ្លាប់​បានទទួល​ការគាំទ្រ​ខ្លាំង​តាមរយៈ​រឿង «​មរណ​មាតា​» រូបនេះ​នៅតែ​មិន​បោះបង់​ការងារ​សិល្បៈ​ចោល​ដែរ​នាង​នៅតែ​លេចមុខ​ម្តងម្កាល​នៅតាម​ការប្រគំ​តន្ត្រី​របស់​ស្ថានីយទូរទស្សន៍​នានា​។​

         ​លោក លី សុខ​ជុន ដែលជា​ឪពុក​បង្កើត​របស់​នាង​ឲ្យ​ដឹងថា​៖«​កន្លងមក​មាន​ខាង​ផលិតកម្ម​ច្រើនណាស់​ទាក់ទង​ហៅ​សីហា​ថត តែមាន​ពេលខ្លះ​នាង​បដិសេធ​មិន​ទៅ​ថត​ឲ្យ​ទេ​ព្រោះ​នាង​មាន​អារម្មណ៍​ខ្មាសអៀន​នឹង​មហាជន​ដែរ ខណៈ​រូបរាង​នាង​ធាត់​មិន​ដូច​កាលពី​ពីរ​បី​ឆ្នាំមុន​»​។​

         ​ប៉ុន្តែ​យ៉ាងណា លី សុខ​ជុន បាន​បញ្ជាក់ថា​៖ «​កូន​ខ្ញុំ​នាង​មិន​ដើរ​ចេញពី​សិល្បៈ​ឡើយ​បើទោះជា​រូបរាង​នាង​ប្រែប្រួល​យ៉ាងណាក៏ដោយ​។ តែ​គ្រាន់តែ​កាត់បន្ថយ​និង​ម្យ៉ាង​នាង​ជាប់រវល់​ច្រើន​នឹង​ការងារ​សម្អាង​របស់​នា​ង​»៕

07-m (1) ប្រភព postkhmer​